मुंबई : निसर्ग चक्रीवादळानंतर एक दिवस विश्रांती घेतलेल्या पावसाने पुन्हा एकदा मुंबईत दमदार हजेरी लावली. मुंबई शहरासह उपनगरात मध्यरात्रीपासून मुसळधार पाऊस कोसळत आहे. मुंबईतील दादर, माटुंगा, सायन, कुर्ला, किंग्ज सर्कल या भागात पावसाने जोर धरला आहे. तर दुसरीकडे गोरेगाव, मालाड, कांदिवली, बोरिवली परिसरात वीजेच्या कडकडाटासह पाऊस कोसळत आहे. (Mumbai Rain)
मुंबईत होणाऱ्या पावसामुळे अनेक सखल भागात पाणी साचले. किंग्ज सर्कल, मालाड या काही भागात रस्त्यांवर पाणी साचले आहे. तसेच गाड्यांमध्ये पाणी गेल्यामुळे गाड्याही बंद पडल्या आहेत. तर विलेपार्ल्यात अनेक ठिकाणी झाडे कोलमडून पडली आहे. मुंबईसह ठाणे, नवी मुंबई, कल्याण, नालासोपारा, वसई विरार या ठिकाणीही मध्यरात्रीपासून पावसाची संततधार पाहायला मिळत आहे.
नालासोपाऱ्यात रस्त्याच्या बाजूला पाणी साचले
वसई विरार, नालासोपाऱ्यात मुसळधार पाऊस सुरू आहे. या पावसामुळे मुख्य रस्त्यावर पाणी साचले आहे. तर नालासोपारा पूर्व तुलिंज, आचोले रोडवर रस्त्याच्या दोन्ही बाजूला पाणी साचले आहे.
मिरा भाईंदर परिसरात सकाळपासूनच ढगाळ वातावरण पाहायला मिळत आहे. मिरा रोड, भाईंदर या ठिकाणी पावसाने जोर धरला आहे.
ठाणे, कल्याणमध्ये रात्रीपासून पावसाची संततधार
एक दिवस विश्रांती घेतलेल्या पावसाने कल्याण डोंबिवलीत पुन्हा जोरदार हजेरी लावली. कल्याण डोंबिवली परिसरात रात्रभरापासून पावसाची रिपरिप कायम आहे. मात्र अद्याप या ठिकाणी कुठेही पाणी साचलेले नाही.
ठाण्यात सकाळपासून पावसाला सुरुवात झाली आहे. त्यामुळे वातावरणात गारवा निर्माण झाला आहे. पावसामुळे अनेक ठिकाणी ढगाळ वातावरण दिसून येत आहे. विजांच्या कडकडाट पावसाने ठाण्यातील काही ठिकाणी हजेरी लावली. पहाटेची वेळ असल्याने रस्ते निर्मनुष्य आहे. मात्र काही प्रमाणात गाड्या सुरु आहेत.
पुण्यातही मुसळधार पावसाची शक्यता
पुणे शहर आणि परिसरात आज मुसळधार पावसाची शक्यता हवामान विभागाने वर्तवली आहे. पुण्यात दुपारनंतर आकाश सामान्यतः ढगाळ राहण्याची शक्यता आहे. निसर्ग चक्रीवादळामुळे पुण्यात जूनच्या पहिल्या पाच दिवसात 101.01 मिमी पावसाची नोंद करण्यात आली आहे.
दरम्यान येत्या 24 तासात कोकण, मध्य महाराष्ट्र आणि मराठवाड्यात तुरळक ठिकाणी ढगांच्या गडगडाटसह पाऊस पडण्याची शक्यता वर्तवली जात आहे. पुणे हवामान विभागाने हा अंदाज वर्तवला आहे. (Mumbai Rain)
#MumbaiRains | मुंबईसह उपनगरात मुसळधार पाऊस, मध्यरात्रीपासून पावसाची संततधार कायम #Mumbai #MumbaiRains pic.twitter.com/fpgZPX3C8N
— TV9 Marathi (@TV9Marathi) June 6, 2020
संबंधित बातम्या :
Mumbai Rains | मुंबईत पावसाळ्यातील 24 दिवस सतर्कतेचे, समुद्रात कधी किती उंच लाटा उसळणार?
Cyclone Nisarga | मुंबईवरचा धोका टळला, चक्रीवादळ पुढे सरकले : हवामान विभाग
कमेंट करा
Source: https://www.tv9marathi.com/mumbai/mumbai-rain-heavy-rain-in-mumbai-from-last-night-in-mumbai-and-suburban-area-228008.html
