मुंबई बातम्या

आता मुंबई पोलिसांच्याच शरीरावर कॅमेरे बसविणार – Maharashtra Times

आता मुंबई पोलिसांच्याच शरीरावर कॅमेरे बसविणार
मुंबई: मुंबई गुन्हेगारी मुक्त करण्यासाठी मुंबई पोलिसांनी कंबर कसली आहे. देशाची आर्थिक राजधानी असलेल्या मुंबईत सुमारे ५ हजार सीसीटीव्ही कॅमेरे लावण्यात आलेले असतानाच आता ५०० मुंबई पोलिसांच्या शरीरावरही कॅमेरे बसविण्यात येणार आहेत. ‘बॉडी वॉर्न कॅमेरा’ असं या कॅमेऱ्यांचं नाव आहे. त्याशिवाय पोलिसांच्या गाडीसमोरील काचेवर आणि गाडीवरही कॅमेरे बसविण्यात येणार आहेत. त्यामुळे पोलिसांना घडणारा गुन्हा रोखता येणार असून गुन्हेगारांच्याही मुसक्याही आवळता येणार आहेत.

मुंबईत कोणतंही मोठं आंदोलन, मोर्चा, मिरवणुका आणि सभा असतील तर त्यावेळी कर्तव्यावर असणाऱ्या पोलिसांच्या शरीरावर हे बॉडी वॉर्न कॅमेरे बसविण्यात येतील. तसेच गस्तीवर असणाऱ्या पोलिसांच्या शरीरावर हे कॅमेरे बसविण्यात येणार आहेत. या कॅमेऱ्याने केवळ दिवसाच नाही तर रात्रीही रेकॉर्डिंग केली जाणार आहे. या कॅमेऱ्यात वायफाय, जीपीएस, ब्लूटुथ सारख्या सुविधा असतील आणि हे कॅमेरे कँट्रोल रुमशी कनेक्ट असतील. केवळ गुन्ह्याचा तपास लावतानाच नव्हे तर पोलिसांवर जमावकडून होणारा हल्ला आणि वाहतुकीचं होणारं उल्लंघन आदी प्रसंगातही या कॅमेऱ्यांचा पोलिसांना फायदा होणार आहे.

दाभोलकरांच्या हत्येतील पिस्तुल खाडीत सापडलं?

पोलिसांच्या १०० गाड्यांच्या समोरील काचांवर डॅश कॅमेरे लावण्यात येणार आहेत. या कॅमेऱ्यातून पळून जाणाऱ्या सर्व आरोपींची रेकॉर्डिंग केली जाणार आहे. पोलिसांच्या व्हॅन अथवा जीपवर हल्ला केल्यास त्याचीही रेकॉर्डिंग होणार आहे. या शिवाय पोलीस दल आणखी १०० कॅमेरे खरेदी करणार आहे. हे कॅमेरे गाड्यांच्या टपावर लावण्यात येणार आहेत. हे कॅमेरे सुद्धा कंट्रोल रुमशी कनेक्ट राहणार आहेत. तणावाच्या काळात फिल्डवर अधिकाधिक फौजफाटा पोहोचवण्याचा निर्णय घेतानाही या कॅमेऱ्यांचा उपयोग होणार आहे, असं सूत्रांनी सांगितलं.

‘फ्लिपकार्ट’च्या बन्सलविरुद्ध पत्नीची तक्रार

व्हिडिओः तरुणीचा दुचाकीवरील ताबा सुटला अन्

Source: https://maharashtratimes.indiatimes.com/maharashtra/mumbai-news/mumbai-police-to-wear-bodycams-to-safeguard-women/articleshow/74491125.cms